Póst og fjarskiptastofnun

Túngumál EN
Heim

Ákvörðun PFS nr. 17/2016

 28. október 2016

Póst- og fjarskiptastofnun (PFS) hefur birt ákvörðun sína nr. 17/2016 um heildsölugjaldskrá fyrir upphaf og lúkningu símtala í föstum almennum talsímanetum (markaðir 2/2008 og 3/2008). Mælt er fyrir um að niðurstaða verðsamanburðar sem stofnunin hefur framkvæmt verði grundvöllur hámarksverða fyrir upphaf og lúkningu símtala. Nánari lýsingu á þeim viðmiðum sem fylgt var við verðsamanburðinn má finna í ákvörðuninni hér að neðan.

Samkvæmt ákvörðuninni skal heildsölugjald fyrir upphaf símtala í föstu talsímaneti Símans vera að hámarki 0,50 kr./mín. Þá skal heildsölugjald fyrir lúkningu símtala í föstum almennum talsímanetum vera 0,14 kr./mín. og skal það verð gilda sem hámarksverð hjá Símanum, Vodafone, Nova, Símafélaginu og Hringdu.
Hin nýju heildsöluverð taka gildi frá og með 1. janúar 2017.

Ákvörðun PFS um heimsölugjaldskrá byggir á ákvörðun PFS nr. 36/2012 um útnefningu fyrirtækja með umtalsverðan markaðsstyrk og álagningu kvaða á heildsölumörkuðum fyrir upphaf og lúkningu símtala í föstum almennum talsímanetum. Samkvæmt þeirri ákvörðun skal PFS ákvarða gjaldskrá fyrir upphaf og lúkningu símtala í fastanetinu með verðsamanburði.

Á tímabilinu 11. ágúst til 1. september sl. fór fram innanlandssamráð um umræddar breytingar á gjaldskrá fyrir upphaf og lúkningu símtala í fastanetinu. Athugasemdir bárust frá Símanum hf. Gerð er grein fyrir athugasemdum Símans hf. og afstöðu PFS í ákvörðuninni.

Þá voru drög að ákvörðuninni send Eftirlitsstofnun EFTA (ESA) og öðrum eftirlitsstofnunum á EES-svæðinu til samráðs þann 27. september 2016. Gerði ESA ekki efnislegar athugasemdir við ákvörðunardrög PFS.

Ákvörðun PFS nr. 17/2016 Heildsölugjaldskrá fyrir upphaf og lúkningu símtala í föstum almennum talsímanetum

Viðauki I gengistafla

Viðauki II Álit ESA

Fannst þér efnið á síðunni hjálplegt?Nei
Takk fyrir

Ábending þín er móttekin

Af hverju ekki?