Upplýsingar vegna tíðniuppboðs 22. maí 2017

Póst- og fjarskiptastofnun hefur auglýst uppboð á tíðniheimildum á fjórum tíðnisviðum, 700 MHz, 800 MHz, 2100 MHz og 2600 MHz. Um er að ræða alls tólf tíðniheimildir sem ætlaðar eru fyrir háhraða farnetsþjónustu.

Verður uppboðið haldið mánudaginn 22. maí nk. Það mun fara fram á rafrænu uppboðssvæði stofnunarinnar og hefst kl. 10:00 þann dag.

Hér fyrir neðan eru skjöl vegna uppboðsins, niðurstöður úr samráði sem haldið var 23. mars sl. og spurningar sem stofnuninni berast á undirbúningstímanum fram að uppboðinu og svör við þeim.

Almennt um uppboðið

PFS tilkynnti þann 11. október 2016 að uppboð á tíðniheimildum fyrir háhraða farnetsþjónustu væri fyrirhugað og birti drög að uppboðsskilmálum til umsagnar. Eftir að samráði um drög að skilmálum lauk uppfærði PFS skilmála með tilliti til framkominna athugasemda. Auk þess var í uppfærðum drögum gert ráð fyrir að boðnar yrðu upp tíðnir á 800 MHz tíðnisviðinu sem fyrri rétthafi skilaði til PFS í febrúar 2017. PFS efndi til samráðs um uppfærða skilmála þann 23. mars 2017. Niðurstöður úr því samráði liggja nú fyrir og skilmálar hafa verið uppfærðir í samræmi við niðurstöður PFS.

Þær tíðniheimildir sem boðnar verða upp eru eftirfarandi:

Númer	Stærð	Tíðnisvið	Gildistími	Lágmarksboð
A 700	2x10 MHz	713-723 / 768-778 MHz	15 ár	35 milljónir kr.
B 700	2x10 MHz	723-733 / 778-788 MHz	15 ár	35 milljónir kr.
C2 800	2x5 MHz	791-796/832-837 MHz	15 ár	17,5 milljónir
D2 800	2x5 MHz	796-801/837-842 MHz	15 ár	17,5 milljónir
E 2100	2x5 MHz	1935 - 1940/ 2125 - 2130 MHz	5 ár	5,5 milljónir kr.
F 2100	2x5 MHz	1970 - 1975/ 2160 - 2165 MHz	5 ár	5,5 milljónir kr.
G 2100	2x5 MHz	1975 - 1980/ 2165 - 2170 MHz	5 ár	5,5 milljónir kr.
H 2600	2x20 MHz	2500 - 2520 / 2620 - 2640 MHz	15 ár	10 milljónir kr.
I2600	2x20 MHz	2520 - 2540 / 2640 - 2660 MHz	15 ár	10 milljónir kr.
J 2600	2x10 MHz	2540 - 2550 / 2660 - 2670 MHz	15 ár	5 milljónir kr.
K2600	2x10 MHz	2550 - 2560 /2670 - 2680 MHz	15 ár	5 milljónir kr.
L2600	2x10 MHz	2560 - 2570 / 2680 - 2690 MHz	15 ár	5 milljónir kr.

Umrædd tíðnisvið skal nýta fyrir háhraða farnetsþjónustur, en eru að öðru leyti tæknilega hlutlaus. Tíðniheimildir á 700 MHz og 800 MHz tíðnisviðinu verða bundnar ákveðnum skilyrðum um uppbyggingu og útbreiðslu þjónustu.

Þeir aðilar sem hyggjast taka þátt í uppboðinu skulu skila inn útfylltu þátttökublaði, kvittun fyrir greiðslu þátttökugjalds og öðrum skráningargögnum samkvæmt skilmálum uppboðsins, til Póst- og fjarskiptastofnunar, Suðurlandsbraut 4, 108 Reykjavík, fyrir kl. 14:00 þriðjudaginn 2. maí 2017.

Lágmarks þátttökugjald sem greiða þarf áður en sótt er um þátttöku er kr. 2.000.000,-, en komið getur til greiðslu frekara þátttökugjalds sem ræðst af fjölda þátttakenda, sbr. skilmála uppboðs.

PFS mun tilkynna aðilum sem óska þátttöku ákvörðun sína um hvort viðkomandi verði heimilt að taka þátt í uppboðinu 8. maí 2017.

Mun tíðniuppboðið fara fram rafrænt og hefst það á rafrænu uppboðssvæði PFS mánudaginn 22. maí nk. kl. 10:00.