Hoppa yfir valmynd

PFS efnir til samráðs um heimild Mílu til að veita nýja þjónustu á leigulínumarkaði

Túngumál EN
Heim

PFS efnir til samráðs um heimild Mílu til að veita nýja þjónustu á leigulínumarkaði

14. maí 2014

Með erindi frá Mílu, dags. 30. apríl sl., barst Póst- og fjarskiptastofnun (PFS) ósk félagsins um samþykki stofnunarinnar fyrir því að Míla bjóði fram nýja þjónustu.

Um er að ræða nýja Ethernet þjónustu sem byggir á MPLS-TP tæknibúnaði Mílu. Með þessum búnaði getur Míla boðið pakkaskipta gagnaflutningsþjónustu sem byggir á Ethernet-tækni og hefur það umfram þá tækni sem Míla hefur hingað til notað (SDH) að hægt er að skilgreina meðal annars mismunandi forgangsröðun pakka, frátekna eða samnýtta bandvídd, forgangsröðun og VLAN-aðgreiningu.

Míla hefur þegar kynnt þessa þjónustu á heimasíðu sinni, sjá http://mila.is/um-milu/frettir/nanar/item21543/. Þar koma fram þau verð og þeir skilmálar sem Míla hyggst bjóða upp á.

Meginreglan er sú að Mílu er óheimilt að hefja veitingu nýrrar þjónustu á þessum markaði sem ekki hefur verið birt til kynningar með a.m.k. þriggja mánaða fyrirvara. Einnig þarf að liggja fyrir samþykki PFS með sérstakri ákvörðun að undangengnu innanlandssamráði og samráði við Eftirlitsstofnun EFTA (ESA). PFS mun á næstunni vinna að umræddu máli og efna til umræddra samráða. Ljóst er að endanleg ákvörðun kemur ekki til með að líta dagsins ljós fyrr en með haustinu.

PFS telur að sú þjónusta sem hér er kynnt til sögunnar sé mikilvæg markaðnum og hyggst því leggja til að Míla fái heimild til að hefja veitingu hennar áður en framangreind ákvörðun PFS lítur dagsins ljós. Ef ekki koma fram málefnaleg andmæli markaðsaðila gagnvart þessum áformum innan neðangreinds frests hyggst PFS því heimila Mílu að hefja veitingu umræddrar þjónustu. Munu þá þau verð og þeir skilmálar sem tilgreindir eru í viðaukunum gilda þar til endanleg ákvörðun PFS liggur fyrir í kjölfar yfirferðar PFS á kostnaðargreiningu og skilmálum Mílu, innanlandssamráðs og samráðs við ESA.

Hafi markaðsaðilar málefnaleg andmæli fram að færa við beiðni Mílu um að félagið bjóði þessa nýju þjónustu áður en endanleg ákvörðun PFS liggur fyrir í þessu máli skulu athugasemdir berast með pósti eða með tölvupósti til Póst- og fjarskiptastofnunar, stílaðar á Huldu Ástþórsdóttur (hulda(hjá)pfs.is) ekki síðar en 28. maí 2014.

Athygli er vakin á því að markaðsaðilar fá síðar tækifæri til að gera efnislegar athugasemdir eða breytingartillögur við niðurstöðu kostnaðargreiningar Mílu vegna þessarar þjónustu sem og þá skilmála sem Míla setur fram. Það samráð sem hér er efnt til er einungis hugsað til að aðilar geti komið með málefnaleg andmæli fyrir því að þessi nýja vara sé boðin, með þeim verðum og skilmálum sem Míla leggur til, áður endanlega ákvörðun PFS liggur fyrir.

 

 

Til baka