Póst og fjarskiptastofnun

Túngumál EN
Heim

PFS bregst við þörfum fyrir aukið 3G tíðnisvið vegna stórra mannamóta

8. ágúst 2014

Í dag úthlutaði Póst- og fjarskiptastofnun (PFS) tímabundið auknu 3G tíðnisviði til Nova og Símans vegna þess álags á fjarskiptakerfi sem fylgir viðburðum þar sem mikill fjöldi fólks kemur saman.

Ágúst er mánuður hinna stóru mannamóta og útihátíða þar sem fjöldi fólks safnast saman á tiltölulega litlu svæði. Sem dæmi má nefna Þjóðhátíð í Eyjum, Hinsegin daga, Menningarnótt, Fiskidaginn mikla á Dalvík og Ljósanótt í Reykjanesbæ sem fylgir í kjölfarið í byrjun september.

Mannamót sem þessi hafa í för með sér mikla notkun á farsímum og með tilkomu snjallsíma eru gagnasamskipti sífellt að aukast, ekki síst til að hlaða upp myndum og upptökum. Þessi mikla notkun á litlu svæði veldur auknu álagi í fjarskiptakerfum og borið hefur við að tíðnisvið og búnaður sem við venjulegar aðstæður nægja til að anna þörfum notenda dugar ekki lengur.

Fjarskiptafélögin hafa lagt í mikla vinnu við endurhönnun kerfa sinna og bætt við sendibúnaði á stöðum þar sem slíkt tímabundið álag er fyrirséð en iðulega dugar það ekki til og þörf er á stærra tíðnisviði en félögin hafa til umráða. Til að koma til móts við þessar þarfir fjarskiptafélaganna og viðskiptavina þeirra hefur Póst- og fjarskiptastofnun því í dag úthlutað tímabundið auknu tíðnisviði fyrir 3G þjónustu til þeirra tveggja aðila sem óskað hafa eftir slíku, þ.e. Nova og Símans.

 

Til baka