Hoppa yfir valmynd

Mílu heimilað að innleiða vigrunartækni á Ljósveitutengingum félagsins

Túngumál EN
Heim

Mílu heimilað að innleiða vigrunartækni á Ljósveitutengingum félagsins

19. nóvember 2014

Póst- og fjarskiptastofnun (PFS) hefur birt ákvörðun sína nr. 29/2014 sem heimilar Mílu að gera breytingu á viðmiðunartilboði sínu um bitastraumsaðgang vegna fyrirhugaðrar vigrunar á VDSL tengingum félagsins. Hér er um að ræða það sem félagið nefnir Ljósveitutengingar Mílu. Umræddar breytingar skulu birtast sem viðbót við umrætt viðmiðunartilboð sem verður viðauki 2a og hefur að geyma upplýsingar um tæknilega útfærslu vigrunar. 

Vigrun (e. vectoring) er tækni sem minnkar milliheyrsluvandamál (e. crosstalk) í VDSL kerfum sem breidd eru út í götuskápa og eykur þar með afkastagetu VDSL tenginga. Til að stuðla að VDSL væðingu í hinum dreifðari byggðum kvað PFS á um það í ákvörðun nr. 21/2014 að fjarskiptafyrirtæki gætu tryggt sér þriggja mánaða forgangsrétt að hluta heimtaugar (oftast götuskápum) að tilteknum skilyrðum uppfylltum. Ákveði Míla að nýta sér umræddan forgangsrétt þarf félagið að tryggja öðrum fjarskiptafyrirtækjum opinn sýndaraðgang (VULA) að viðkomandi tengingum og hefja vigrun á þeim innan tímamarks umrædds forgangsréttar. 

Á tímabilinu 23. júlí til 20. ágúst sl. fór fram innanlandssamráð um umrædd vigrunar áform Mílu. Athugasemdir bárust frá Vodafone og Snerpu á Ísafirði. Gerð er grein fyrir umræddum athugasemdum og viðbrögðum PFS við þeim í umræddum ákvörðunardrögum. Ákvörðunardrögin voru ennfremur send til Eftirlitsstofnunar EFTA (ESA) og annarra eftirlitsstofnana á EES-svæðinu til samráðs þann 14. október 2014 með vísan til 7. gr. laga nr. 69/2003 um Póst- og fjarskiptastofnun og 7. gr. rammatilskipunar ESB nr. 2002/21/EB. Þann 14. nóvember sl. barst PFS álit ESA sem gerða engar athugasemdir við drögin.   

Sjá ákvörðunina í heild:(pdf)

- Íslenska
- Enska - Álit ESA

Til baka