Hoppa yfir valmynd

Samráð við ESA um heildsölugjaldskrá fyrir upphaf og lúkningu símtala í föstum almennum talsímanetum

Túngumál EN
Heim

Samráð við ESA um heildsölugjaldskrá fyrir upphaf og lúkningu símtala í föstum almennum talsímanetum

27. september 2016

Í dag sendi Póst- og fjarskiptastofnun (PFS) drög að ákvörðun varðandi heildsölugjaldskrá fyrir upphaf og lúkningu símtala í föstum almennum talsímanetum (markaðir 2 og 3) til ESA, Eftirlitsstofnunar EFTA. 

Samkvæmt ákvörðunardrögunum skal heildsölugjald fyrir upphaf símtala í föstu talsímaneti Símans vera að hámarki 0,50 kr./mín. Þá skal heildsölugjald fyrir lúkningu símtala í föstum almennum talsímanetum vera 0,14 kr./mín. og skal það verð gilda sem hámarksverð hjá Símanum, Vodafone, Nova, Símafélaginu og Hringdu. Nánari lýsingu á þeim viðmiðum sem fylgt var við verðsamanburðinn má finna í ákvörðunardrögunum hér fyrir neðan.

Samkvæmt ákvörðunardrögunum er áformað að heildsölugjaldskráin taki gildi frá og með 1. janúar 2017.

Á tímabilinu 11. ágúst til 1. september sl. fór fram innanlandssamráð um umræddar breytingar á gjaldskrá fyrir upphaf og lúkningu símtala í föstum almennum talsímanetum. Athugasemdir bárust frá Símanum hf.  Gerð er grein fyrir athugasemdum Símans og afstöðu PFS í ákvörðunardrögunum.

Ákvörðunardrögin eru nú send til ESA og annarra eftirlitsstofnana á EES-svæðinu til samráðs með vísan til 7. gr. laga nr. 69/2003 um Póst- og fjarskiptastofnun og 7. gr. rammatilskipunar ESB nr. 2002/21/EB. Umræddir aðilar hafa einn mánuð til að setja fram athugasemdir við ákvörðunardrögin. Eftir það getur PFS formlega tekið ákvörðun nema fram komi óskir frá ESA um að PFS dragi ákvörðunardrögin til baka. Ekki er gert ráð fyrir því að innlendir hagsmunaaðilar geri athugasemdir við ákvörðunardrögin að þessu sinni.

Eftirfarandi drög að ákvörðun PFS voru send ESA:

Draft desicion - Wholesale tariff for call origination and termination on the public telephone network provided at a fixed location

Appendix I – Rate of Exchange

 

Skjölin á íslensku:

Drög að ákvörðun - Heildsölugjaldskrá fyrir upphaf og lúkningu símtala í föstum almennum talsímanetum

Viðauki I - Gengistafla

 

 

 

Til baka