Túngumál EN
Heim

Fréttir

Ný gagnvirk vefkort sýna mælingar á gæðum fjarskiptamerkja á vegum landsins

29. desember 2016

Póst og fjarskiptastofnun (PFS) hefur framkvæmt mælingar á fjarskiptasambandi á helstu vegum í vegakerfinu á Íslandi. Verkefnið var unnið að ósk Fjarskiptasjóðs og fór þannig fram að starfsmenn PFS óku eftir þeim vegum sem mældir voru með tilheyrandi mælitæki.  Mælingarnar stóðu yfir frá haustinu 2015 til haustsins 2016 og þar sem hröð uppbygging á fjarskiptakerfinu er sífellt í gangi geta niðurstöður sýnt lakari dreifingu en raun er orðin síðan mælingarnar voru gerðar. Þá er einnig rétt að hafa í huga að loftnet símtækja geta verið mismunandi að gæðum og því ekki alltaf víst að ferðalangar um vegi landsins fái sömu upplifun varðandi styrk merkja og kortin gefa til kynna.

Myndin sýnir niðurstöður mælinga á styrk fjarskiptamerkja. 4G: Gott=6,40%, Miðlungs=21,40%, Slæmt=72,20%. 3G: Gott=46,10%, Miðlungs=32,30%, Slæmt=21,60%. GSM: Gott=88,10, Miðlungs=10,10%, Slæmt=1,80%

Helstu niðurstöður mælinganna má sjá í töflunni hér til vinstri. GSM farsímakerfið er enn mikilvægasta fjarskiptakerfið á þjóðvegum landsins. Það dekkar vel um 91% vega, UMTS (3G) nær vel til um 66% en LTE (4G) er tiltölulega nýlegt og hefur því litla útbreiðslu eða eingöngu 8,5%. Um 1,4% vega í þessum mældust með eingöngu slæmt GSM samband.
 
Kort af ÍslandiInnan PFS hafa verið unnin gagnvirk vefkort þar sem hægt er að skoða niðurstöður mælinganna fyrir öll fjarskiptakerfin, GSM, 3G og 4G. Hægt er að þysja mjög nákvæmlega inn á einstaka staði og sjá hvar mælingapunktarnir liggja og hver staðan er.
 
Gæði merkjanna eru táknuð með litum skv. skilgreiningunum hér fyrir neðan.
 
Kortin má nálgast með því að smella á myndina hér til hægri. Athugið að kortið opnast í nýjum vefglugga. Skýringar á virkni og notkun kortsins er að finna í kortinu sjálfu.
 

GSM:

Grænt = gott (meira en -75dbm)
Gult = sæmilegt (-95 til -75 dbm)
Rautt = slæmt (< -95 dbm)

3G (UMTS) og 4G (LTE)
Grænt – gott merki (meira en -80 dbm)
Gult – sæmilegt merki (-80 til - 100 dbm)
Rautt – slæmt (< -100 dbm)

 

Um verkefnið

Eftir að Fjarskiptasjóður óskaði eftir því á seinni hluta ársins 2015 að PFS framkvæmdi mælingar á gæðum fjarskiptamerkja á öllum helstu vegum landsins var gerður samningur um verkefnið. Samkvæmt honum var gert ráð fyrir því að PFS myndi skila niðurstöðum fyrir öll fjarskiptafélög sameiginlega og öll farnetskerfi, þ.e. GSM, UMTS (3G) og LTE (4G) á kortavefsjá á vef PFS, ásamt samantekt á niðurstöðum í skýrslu.  Með því að birta niðurstöðurnar fyrir öll fjarskiptafélögin sameiginlega er auðveldara að gera sér grein fyrir því hvar næst í það minnsta samband fyrir neyðarsímtöl (112).

Í samningnum gert ráð fyrir þeim möguleika að niðurstöðurnar verði einnig birtar á vef Vegagerðarinnar og standa nú yfir prófanir á þeirri birtingu.

Verkefninu var skipt í tvo áfanga þar sem fyrri áfanganum hefur verið lokið. Þar er um að ræða stærsta hluta vegakerfisins, þ.e. sem hægt er að aka venjulegum fólksbílum að öllu jöfnu. Ekki hefur verið tekin ákvörðun varðandi seinni áfanga verkefnisins, hálendis- og háfjallavegi, en gera má ráð fyrir því að ákvörðun verði tekin fljótlega á árinu 2017. Á gagnvirka kortinu sem hægt er að nálgast hér fyrir ofan er útbreiðslan á þessum vegum byggð á spálíkani sem PFS hefur gert, þ.e. ekki er um eiginlegar mælingar að ræða á þeim vegaköflum. 

Áfram verður unnið að úrvinnslu upplýsinganna sem fyrir liggja og m.a. skoðað hvort birtar verði upplýsingar fyrir hvert fjarskiptafyrirtæki fyrir sig.

 

 

Til baka