Póst og fjarskiptastofnun

Túngumál EN
Heim

Hlutfall línulegs áhorfs á íslenskar sjónvarpsstöðvar stendur í stað

18. janúar 2017

Með breyttum aðstæðum í flutningi sjónvarpsefnis um fjarskiptanet, koma æ fleiri verkefni sem tengjast fjölmiðlum inn á borð PFS. Sérstaklega hefur reynt á þætti sem tengjast því hvort áhorf á sjónvarpsefni er línulegt, þ.e. fer fram á sama tíma og efnið er sent út, eða hvort um svokallað hliðrað áhorf er að ræða. Hliðrað áhorf er það áhorf sem fram fer eftir upphaflegan útsendingartíma, en innan þess tíma sem áskrifandi hefur aðgang að efninu án þess að borga sérstaklega fyrir það. Slíkt áhorf eftir á, t.d. í tímaflakki/tímavél sem er innan eins sólarhrings frá útsendingu, eða frelsi, byggist á gagnvirkri sjónvarpsþjónustu sem fram fer á fjarskiptanetum og því fellur flutningur þess að hluta til innan fjarskiptalaga.

PFS hefur nú í annað sinn fengið rannsóknarfyrirtækið Gallup til að skoða sérstaklega hlutfall hliðraðs áhorfs á íslenskar sjónvarpsstöðvar, en fyrirtækið hefur mælt sjónvarpsáhorf með rafrænum hætti frá árinu 2008. Sú skýrsla sem hér er lögð fram sýnir þróun á hlutfalli hliðraðs áhorfs gagnvart línulegu áhorfi á síðustu fimm árum, frá upphafi ársins 2012 til loka ársins 2016.

Helsta niðurstaða skýrslunnar nú er að þetta hlutfall stendur nokkurn veginn í stað frá því í fyrra og rúmlega 86% áhorfs á dagskrá íslenskra sjónvarpsstöðva fer fram með línulegum hætti, þ.e. horft er á útsendinguna sjálfa þegar hún fer fram.  Hliðrað áhorf sem fram fer innan sólarhrings frá útsendingu  eykst dálítið, fer úr 8,7% í 9,3% og það hliðraða áhorf sem fer fram eftir sýningardag, en innan viku frá útsendingu minnkar að sama skapi um 0,7%.

Eftir að hliðrað áhorf hafði þrefaldast á árunum 2012 til 2015 sýna mælingar því nú að hlutfall áhorfs utan útsendingartíma hefur nánast alveg staðið í stað milli áranna 2015 og 2016.

Hér fyrir neðan má nálgast skýrsluna í heild, en hafa ber eftirfarandi í huga þegar skýrslan er skoðuð:

  • Eingöngu er um að ræða innlendar sjónvarpsstöðvar
  • Línulegt áhorf er það áhorf sem á sér stað á þeim tíma sem dagskrárliður er sendur út en hliðrað áhorf er allt áhorf sem á sér stað eftir upphaflegan útsendingartíma
  • Áhorf á plússtöðvar telst vera línulegt áhorf, enda er horft á útsendinguna á þeim tíma sem útsendingin er í gangi. Þetta áhorf er sýnt sem hluti af áhorfi á aðalrás viðkomandi plússtöðvar.
  • Eftirfarandi stöðvar voru mældar allt mælitímabilið: Bíóstöðin,RÚV, Stöð 2 og Sjónvarp Símans.
    Krakkastöðin var mæld út febrúar 2015.
    RÚV 2 kom inn í mælinguna í ágúst 2012, Stöð 3 kom inn í mælinguna í september 2013 og Hringbraut kom inn í mælinguna í ágúst 2015.
    Popp TV er inni í mælingunni frá ágúst 2012 til janúar 2016, Gullstöðin er inni í mælingunni frá september 2013 til maí 2016, ÍNN er inni í mælingunni frá september til nóvember 2015 og N4 er inni í mælingunni frá september 2014 til janúar 2016.

Sjá skýrsluna í heild:

Þróun á sjónvarpsáhorfi og hlutdeild hliðraðs áhorfs 2012 – 2016

 


 

Til baka