Túngumál EN
Heim

Nýtt viðmiðunartilboð Mílu fyrir leigulínur í heildsölu tekur gildi þann 1. mars nk.

15. febrúar 2017

Með ákvörðun sinni nr. 3/2017 frá því í dag samþykkir Póst- og fjarskiptastofnun (PFS) að nýtt viðmiðunartilboð Mílu ehf. fyrir leigulínur í heildsölu taki gildi frá og með 1. mars nk. Í máli því sem hér er til umfjöllunar eru skilmálar viðmiðunartilboðsins til meðferðar, aðrir en þeir er snúa að verðum. Um verðin er fjallað í öðrum málum sem nú eru til vinnslu hjá PFS. Endanlegrar niðurstöðu varðandi verðin fyrir lúkningarhluta leigulína er að vænta á næstu vikum, en síðar á árinu varðandi stofnlínuhluta leigulína.

Hið nýja viðmiðunartilboð leysir af hólmi eldra viðmiðunartilboð Mílu um sama efni sem að stofni til er frá árinu 2011. Ofangreind ákvörðun byggir á ákvörðunum PFS nr. 8/2014 (markaður 6/2008) og 21/2015 (markaður 14/2004) þar sem Míla var útnefnt sem fyrirtæki með umtalsverðan markaðsstyrk á heildsölumörkuðum fyrir lúkningarhluta og stofnlínuhluta leigulína, ásamt því sem viðeigandi kvaðir voru lagðar á félagið til að freista þess að leysa þau samkeppnisvandamál sem greind voru á umræddum mörkuðum. Meðal kvaða var að Míla skyldi endurskoða viðmiðunartilboð sitt m.t.t. breyttra markaðsaðstæðna.

Þann 31. maí 2016 bárust PFS fyrstu drög að hinu nýja viðmiðunartilboði Mílu. Þann 16. ágúst sl. efndi PFS til samráðs um viðmiðunartilboð sem lauk 15. september sl. Engar athugasemdir bárust frá markaðsaðilum eða öðrum hagsmunaaðilum. Þann 21. október sl. sendi PFS Mílu til umsagnar drög að fjórum breytingum á viðmiðunartilboðinu sem stofnunin hefði í hyggju að leggja til. Var hugsunin sú að færa þessi atriði til samræmis við viðmiðunartilboð Mílu um heimtaugar sem PFS samþykkti með ákvörðun sinni nr. 9/2016. Svar Mílu barst þann 4. nóvember sl. og gerði Míla athugasemdir til eitt atriði af þessum fjórum. Þann 23. nóvember sl. efndi PFS til samráðs um drög að ákvörðun þeirri sem hér er til umfjöllunar og stóð það til 7. desember sl. Engar athugasemdir bárust.

Þann 5. janúar sl. efndi PFS til samráðs við Eftirlitsstofnun EFTA (ESA) og aðrar eftirlitsstofnanir á EES-svæðinu. Álit ESA barst PFS þann 3. febrúar sl. og gerði stofnunin engar efnislegar athugasemdir við ákvörðunardrögin. Hins vegar gagnrýndi ESA þann drátt sem orðið hefur af hálfu Mílu á að fara eftir ýmsum þeim kvöðum sem á fyrirtækið hafa verið lagðar og benti PFS á þvingunarúrræði þau sem stofnunin hefur samkvæmt hinu evrópska fjarskiptaregluverki.

Sjá nánar í ákvörðunarskjalinu og viðauka:

Ákvörðun PFS nr. 3/2017 - Viðmiðunartilboð Mílu fyrir leigulínur í heildsölu

Viðauki 1 - Fyrirmæli um breytingar

Viðauki 2 - Álit ESA

 

 

Til baka