Túngumál EN
Heim

Samráð við hagsmunaaðila um endurskoðun á gjaldskrá Mílu fyrir ljóslínur

17. júlí 2017

Póst- og fjarskiptastofnun (PFS) hefur lokið við yfirferð á kostnaðargreiningu Mílu ehf. (Mílu) á annars vegar ljóslínum í aðgangsneti (einn þráður og eitt par) og hins vegar ljóslínum í götuskápa (1 til 4 þræðir). Þær vörur sem verðskrá Mílu nær til tilheyra heildsölumörkuðum fyrir lúkningarhluta leigulína og fyrir aðgang að föstum aðgangsnetum sem eru markaðir nr. 6 og 4 samkvæmt tilmælum Eftirlitsstofnunar EFTA (ESA) frá árinu 2008.

Samkvæmt meðfylgjandi drögum að ákvörðun hyggst PFS samþykkja kostnaðargreiningu Mílu með þeim breytingum sem gerðar voru við meðferð greiningarinnar hjá stofnuninni.

Drög þessi byggja á ákvörðunum PFS nr. 8/2014 um útnefningu fyrirtækis með umtalsverðan markaðsstyrk og álagningu kvaða á heildsölumarkaði fyrir lúkningarhluta leigulína, dags. 6. maí 2014 og nr. 21/2014 um útnefningu fyrirtækis með umtalsverðan markaðsstyrk og álagningu kvaða á mörkuðum fyrir heildsöluaðgang að föstum aðgangsnetum og breiðbandsaðgang í heildsölu, dags. 13. ágúst 2014.

Niðurstaða kostnaðargreiningar Mílu er að gjald fyrir ljóslínu í aðgangsneti, eitt par, hækkar úr 16.583 kr. í 19.595 kr. sem er um 18% hækkun. Aðrar ljóslínur hækka til samræmis. Mjög langt er síðan núverandi verð tók gildi og er hækkunin langt undir hækkun verðlags frá þeim tíma.

Hér með er fjarskiptafyrirtækjum og öðrum hagsmunaaðilum gefinn kostur á að gera athugasemdir vegna þeirra draga sem hér liggja fyrir, sbr. 6. gr. laga nr. 69/2003 um Póst- og fjarskiptastofnun. Allar athugasemdir skulu gerðar með greinanlegum hætti þar sem vísað skal í þá liði sem um ræðir. Þegar stofnunin hefur metið framkomnar athugasemdir og gert þær breytingar á frumdrögunum sem hún telur nauðsynlegar verða drögin send til Eftirlitsstofnunar EFTA (ESA),  til samráðs áður en endanleg ákvörðun verður tekin.

Frestur til að skila inn umsögnum og athugasemdum er til og með 18. ágúst nk.

Nánari upplýsingar veitir Hulda Ástþórsdóttir (netfang: hulda(hjá)pfs.is). PFS mun birta opinberlega allar athugasemdir sem berast, nema sérstaklega verði óskað trúnaðar og mun þá stofnunin leggja mat á slíka beiðni.

Drög að ákvörðun PFS - Endurskoðun á heildsölugjaldskrá Mílu fyrir ljóslínur í götuskápa (Markaður 4) og ljóslínur í aðgangsneti (Markaður 6)

Viðauki I - Verðkönnun á leigu á ljósleiðaraþráðum (svörtum ljósleiðara) í aðgangsneti á Norðurlöndunum

 

 

Til baka