Póst og fjarskiptastofnun

Túngumál EN
Heim

PFS kallar eftir samráði um viðbætur við viðmiðunartilboð Mílu fyrir bitastraumsflutning vegna IP sjónvarpsþjónustu á aðgangsleið 3

13. desember 2017

Póst- og fjarskiptastofnun (PFS) hefur lokið yfirferð á breytingum Mílu ehf. á viðmiðunartilboði fyrir bitastraumsflutning vegna nýrrar þjónustu, flutning IP sjónvarpsþjónustu (IPTV) yfir aðgangsleið 3. Nú er Míla ehf. að bjóða IPTV flutning á aðgangsleið 1 en þessi þjónusta hefur ekki verið í boði á aðgangsleið 3. IPTV þjónusta tilheyrir heildsölumarkaði fyrir bitastraumsaðgang sem er markaður nr. 5 samkvæmt tilmælum Eftirlitsstofnunar EFTA (ESA) frá árinu 2008.

Til samráðs eru lögð fram drög að nýjum lið, grein 6.1.2 í viðauka 5 við viðmiðunartilboð Mílu. PFS hyggst samþykkja þessa breytingu með ákvörðun. Mun hún byggjast á ákvörðun PFS nr. 21/2014 um útnefningu fyrirtækis með umtalsverðan markaðsstyrk og álagningu kvaða á heildsölumörkuðum heimtauga og bitastraums.

Hér með er fjarskiptafyrirtækjum og öðrum hagsmunaaðilum gefinn kostur á að gera athugasemdir vegna þeirra draga sem hér liggja fyrir, sbr. 6. gr. laga nr. 69/2003 um Póst- og fjarskiptastofnun. Allar athugasemdir skulu gerðar með greinanlegum hætti þar sem vísað skal í þá liði sem um ræðir. Þegar PFS hefur metið framkomnar athugasemdir og gert þær breytingar á frumdrögunum sem stofnunin telur nauðsynlegar mun PFS senda drögin til ESA til samráðs áður en endanleg ákvörðun verður tekin.

Frestur til að skila inn umsögnum og athugasemdum er til og með föstudeginum 5. janúar nk.

Nánari upplýsingar veitir Guðmann Bragi Birgisson (netfang: gudmann(hjá)pfs.is).

PFS mun birta opinberlega allar athugasemdir sem berast, nema sérstaklega verði óskað trúnaðar og mun þá stofnunin leggja mat á slíka beiðni.

Sjá nánar í samráðsskjalinu:

Ný grein 6.1.2 í viðauka 5 við viðmiðunartilboð Mílu fyrir bitastraumsþjónustu

 

 

Til baka