Íslenskur fjarskiptamarkaður í tölum - tölfræðiskýrsla PFS fyrir árið 2017 komin út

Tvisvar á ári safnar Póst- og fjarskiptastofnun (PFS) upplýsingum frá skráðum fjarskiptafyrirtækjum hér á landi um ýmsar stærðir í rekstri og þjónustu á sviði fjarskipta. Upp úr þeim tölum vinnur stofnunin tölfræðiskýrslur sem sýna upplýsingar um helstu stærðir og fyrirtæki á íslenskum fjarskiptamarkaði. Markmiðið er að bæta upplýsingagjöf og auka gagnsæi á þessum markaði og eru skýrslur PFS í samræmi við þær skýrslur sem systurstofnanir PFS í nágrannalöndum okkar gefa út.

Skýrslan sem nú er birt sýnir tölfræði um fjarskiptamarkaðinn fyrir allt árið 2017. Hún inniheldur tölulegar upplýsingar um helstu þætti á markaðnum og samanburð við stöðuna á árunum á undan. Skýrslunni er skipt upp eftir fastanetinu, farsímanetinu, föstum internettengingum og veltu og fjárfestingu á fjarskiptamarkaði.

Sú breyting varð á samsetningu markaðarins á árinu að 365 miðlar hurfu af fjarskiptamarkaði við kaup Vodafone á ljósvaka- og fjarskiptaeignum fyrirtækisins. Í tölfræðiskýrslunni nú eru sameiginlegar upplýsingar beggja fyrirtækjanna eingöngu birtar undir nafni Vodafone fyrir árið 2017.

Meðal helstu tölulegu upplýsinga um íslenska fjarskiptamarkaðinn árið 2017 má nefna:

• Heimasími
  • Fjöldi áskrifenda lækkar lítillega en mínútum heldur áfram að fækka mikið milli ára
  • Netsímaáskrifendum (VoIP) hefur fjölgað með aukinni lagningu ljósleiðara og niðurlagningu á eldra heimasímakerfi (PSTN kerfi) Símans
  • Síminn og Vodafone eru stærstu fyrirtækin á markaði fyrir heimasíma með um 94% hlutdeild
• Farsími
  • Farsímaáskriftum fjölgar lítillega, í takt við fólksfjölgun sem varð um 3% á árinu skv. Hagstofu Íslands.
  • Þrjú félög, Nova, Vodafone og Síminn skipta nokkurn veginn jafnt með sér markaðshlutdeild á farsímamarkaði
  • Fjölgun hefur orðið í samningsbundnum áskriftum en fyrirframgreiddum símakortum fækkar
  • Skilaboðum (SMS og MMS) fækkar lítillega
  • Gagnamagn á farsímaneti heldur áfram að aukast þó dregið hafi úr aukningunni, en hún hefur verið mjög mikil undanfarin ár með innleiðingu á 4G
  • Í farsímanetum er hlutfallslega meira gagnamagn notað í símum en í öðrum tækjum sem eru eingöngu fyrir gagnanotkun, t.d. spjaldtölvum.

• Fastar nettengingar
  • Internettengingum hefur fjölgað lítillega þegar á heildina er litið, en mikil aukning er í ljósleiðaratengingum samhliða fækkun í xDSL tengingum. Um síðustu áramót voru ljósleiðaratengingar 43% allra internettenginga.
    
    
• Sjónvarp
  •  Áskrifendur með sjónvarp yfir IPTV eru 107.389 í lok árs 2017, en voru 99.091 í lok árs 2016
    
    
• Velta og fjárfesting
  • Velta á fjarskiptamarkaði jókst lítillega á árinu 2017. Tekjur af heimasíma og farsíma fóru lækkandi en aftur á móti hafa tekjur af fastaneti, gagnaflutningum og internetþjónustu ásamt sjónvarpsþjónustu farið hækkandi.
  • Fjárfesting á fjarskiptamarkaði hefur aukist mikið á síðustu tveimur árum. Aukningin hefur aðallega orðið í fastaneti, m.a. vegna lagningar ljósleiðara, en fjárfestingar í farsímarekstri hafa hins vegar dregist saman.

Helstu stærðir á farsímamarkaði má sjá í töflunni hér fyrir neðan sem einnig er að finna í skýrslunni sjálfri.

Sjá tölfræðiskýrsluna í heild:

Tölfræði PFS um íslenska fjarskiptamarkaðinn 2017

Bakgrunnsupplýsingar - töflur og myndir - Excel skjal