Póst og fjarskiptastofnun

Túngumál EN
Heim

Ný tölfræðiskýrsla fyrir árið 2017 um fjarskiptanotkun á Norðurlöndum og í Eystrasaltslöndunum: 59-95% heimila geta tengst háhraðaneti.

28. júní 2018

20. júní 2018 kom út skýrsla sem Póst- og fjarskiptastofnun (PFS) og systurstofnanir hennar á Norðurlöndunum og í Eystrasaltslöndunum hafa tekið saman um notkun helstu þátta fjarskiptaþjónustu og þróun undanfarinna ára í löndunum átta. Þetta er níunda árið í röð sem fjarskiptanotkun íbúa Norðurlandanna er borin saman og Eystrasaltslöndin hafa einnig verið með síðustu ár.

Á heildina litið er fjarskiptanotkun mjög lík í þessum löndum og íbúar þeirra nýta sér sambærilega tækni á svipaðan máta. Þrátt fyrir það má þó víða sjá mun á notkun og þróun einstakra þátta.

Íslendingar eru enn eitt árið með flestar fastar háhraðainternettengingar miðað við höfðatölu fyrir auglýstan niðurhalshraða 30 Mb/sek. eða meira. Ástæðuna má rekja til fjölgunar VDSL og ljósleiðaratenginga hér á landi.

Þegar kemur að útbreiðslu háhraðaneta með 30 Mb/sek eða meira eru 93% íslenskra heimila tengd slíkum netum. Hvað varðar útbreiðslu háhraðaneta er í skýrslunni gerður greinarmunur á „homes connected“ og „homes passed“, tölurnar fyrir Ísland miða við skilgreininguna „homes connected“ sem þýðir að inntak heimtaugar netsins er frágengið fyrir innan útvegg. „Homes passed“ sem önnur lönd nota þýðir hins vegar að tenging er til staðar úti í götu og mögulegt að fá hana lagða inn í hús með skömmum fyrirvara. Tölur landanna eru þó sambærilegar því í báðum tilvikum er útbreiðsluverkefni lokið og heimili getur pantað þjónustu þar sem netið verður fulltengt inn á heimilið þegar pöntun berst.

Samkvæmt ofangreindum skilgreiningum er Danmörk á toppnum með útbreiðslu til 95% heimila, Ísland í öðru sæti með 93% og Svíþjóð með 89%.

Háhraðainternettengingum með 100 Mb/sek og meira hefur fjölgað í öllum löndunum sem taka þátt í samanburðinum. Þar eru Íslendingar í öðru sæti á eftir Svíum, en flest löndin eru fyrir ofan meðaltalið í Evrópusambandslöndunum. Svíar eru einnig lang efstir hvað varðar áskriftir þar sem tæki eru í sjálfvirkum samskiptum við önnur tæki. Þetta eru svokallaðar tæki í tæki eða TíT áskriftir sem á ensku kallast Machine to Machine eða M2M.

Gagnamagnsnotkun í farnetum heldur áfram að aukast hratt í öllum löndunum en þar bera Finnar höfuð og herðar yfir hinar þjóðirnar. Íslendingar, Danir og Svíar skera sig úr þegar litið er til áskrifta að fastlínusíma með IP tækni. Aukningin hér á landi skýrist m.a. af fjölgun ljósleiðaratenginga hérlendis og fyrirhugaðri lokun á talsímakerfinu PSTN sem áætlað er að leggja niður árið 2020. Þess ber að geta að hinir almennu notendur eiga ekki að verða varir við þá breytingu.

Sjá skýrsluna í heild (á ensku):

Telecommunication Markets in the Nordic and Baltic Countries 2017

Tölfræðina má einnig skoða í gagnagrunni hennar sem geymdur er hjá systurstofnun PFS í Svíþjóð, Post- og telestyrelsen:

http://statistik.pts.se/nordic-baltic-telecom-market/

 
Hér á vefnum má einnig nálgast allar samanburðarskýrslurnar frá upphafi á einum stað.

 

Til baka