Hoppa yfir valmynd

PFS kallar eftir samráði um markaðsgreiningar á leigulínumörkuðum

Túngumál EN
Heim

PFS kallar eftir samráði um markaðsgreiningar á leigulínumörkuðum

27. nóvember 2013

Póst- og fjarskiptastofnun hefur lokið við frumdrög að markaðsgreiningu á tveimur leigulínumörkuðum. Annars vegar er um að ræða heildsölumarkað fyrir lúkningarhluta leigulína (markaður 6) og hins vegar smásölumarkað fyrir lágmarksframboð af leigulínum (markaður 7 skv. eldri tilmælum ESA). Þriðji og síðasti leigulínumarkaðurinn, þ.e. heildsölumarkaður fyrir stofnlínuhluta leigulína (markaður 14 skv. eldri tilmælum ESA), verður greindur á næstu mánuðum og er áætlað að hann fari í innanlandssamráð á fyrsta ársfjórðungi 2014.

Umræddir markaðir voru síðast greindir með ákvörðun PFS nr. 20/2007 frá 14. september 2007. Þá voru Síminn og Míla útnefnd sem fyrirtæki með umtalsverðan markaðsstyrk á umræddum heildsölumörkuðum, en Síminn eitt fyrirtækja á umræddum smásölumarkaði. Viðeigandi kvaðir voru lagðar á félögin til að freista þess að leysa úr þeim samkeppnisvandamálum sem greind höfðu verið á umræddum mörkuðum.

Það er fyrirhuguð niðurstaða PFS að Míla sé ennþá með umtalsverðan markaðsstyrk á heildsölumarkaði fyrir lúkningarhluta leigulína (markaður 6) en Síminn starfar hins vegar ekki lengur á þeim markaði. PFS hyggst því viðhalda kvöðum á Mílu á þeim markaði.

Það er hins vegar fyrirhuguð niðurstaða PFS að verulegar aðgangshindranir séu ekki lengur til staðar á smásölumarkaði fyrir lágmarksframboð af leigulínum (eldri markaður 7). Því hyggst PFS aflétta kvöðum á Símann á þeim markaði sem þar af leiðandi verður kvaðalaus, gangi áformin eftir.

Eins og áður segir mun PFS efna til samráðs um greiningu á heildsölumarkaði fyrir stofnlínuhluta leigulína (eldri markaður 14) fljótlega á næsta ári.

Óskað er viðbragða fjarskiptafyrirtækja og annarra hagsmunaaðila við þeim frumdrögum sem hér liggja fyrir, sbr. 6. gr. laga nr. 69/2003 um Póst- og fjarskiptastofnun. Allar athugasemdir skulu gerðar með greinanlegum hætti þar sem vísað skal í þá liði sem um ræðir.

Frestur til að skila inn umsögnum og athugasemdum er til og með 6. janúar 2014.

Nánari upplýsingar veitir Guðmann B. Birgisson (gudmann(hjá)pfs.is).

PFS mun birta opinberlega allar athugasemdir sem berast, nema sérstaklega verði óskað trúnaðar og mun þá stofnunin leggja mat á slíka beiðni.

Sjá samráðsskjöl:

Frumdrög að greiningu á heildsölumarkaði fyrir lúkningarhluta leigulína (markaður 6
) (PFD)
Frumdrög að greiningu á smásölumarkaði fyrir lágmarksframboð af leigulínum (eldri markaður 7) PDF)

Sjá meira um markaðsgreiningar hér á vefnum.

Til baka