Póst og fjarskiptastofnun

Túngumál EN
Heim

PFS boðar ákvörðun um skyldu Mílu til að útvega tengingar við almenna fjarskiptanetið

5. september 2014

Póst- og fjarskiptastofnun hefur sent Mílu ehf. boðaða ákvörðun um þá skyldu innan alþjónustu, að útvega tengingu við almenna fjarskiptanetið, sbr. 1. mgr. 6. gr. reglugerðar um alþjónustu, nr. 1356/2007, sbr. 3. mgr. 19. gr., sbr. 1. mgr. 20. gr. fjarskiptalaga nr. 83/2003.

Boðun ákvörðunarinnar kemur í framhaldi af umræðuskjali stofnunarinnar sem birt var hér á vefnum þann 21. febrúar 2014, þar sem hagsmunaaðilum var boðið að tjá sig um nokkrar leiðir sem kynntar voru.

Í samráðinu bárust athugasemdir frá 10 aðilum og voru þær birtar á heimasíðu PFS þann 2. september sl.

Á undanförnum árum hefur ákall notenda eftir öflugri tengingum sífellt aukist. Á nokkrum stöðum á landinu hafa fyrirtæki lagt ljósleiðara heim til notenda sem gefur kost á bandbreiðari tengingum. Þetta hefur m.a. verið gert í Reykjavík, Akureyri og nokkrum minni stöðum á landinu.

Míla hefur einnig uppfært aðgangskerfi sitt með svokallaðri Ljósveitu (VDSL tækni). Áætlanir fyrirtækisins gera ráð fyrir að hægt sé að uppfæra um 90% af núverandi tengingum fyrirtækisins með þessari tækni. Það er einkum fjarlægð heimila frá götuskáp, sem kemur í veg fyrir að fyrirtækið geti uppfært allar tengingar fyrirtækisins með þessari tækni.

Ef áætlanir fyrirtækisins ganga eftir munu þó 10% af heimilum landsins ekki eiga kost á háhraðatengingum um almenna fjarskiptanetið nema að farið verið í endurnýjun á þeim tengingum sem fyrir eru. Í því felst í flestum tilfellum að skipta út núverandi koparheimtaugum fyrir ljósleiðara.

Míla, sem er núverandi alþjónustuhafi, hefur hins vegar hingað til ekki séð sér fært að fara í slíka endurnýjun þar sem aðstæður eru þannig að kostnaðar við endurnýjunina er mikill en litlir möguleikar til að endurheimta fjárfestinguna í gegnum gjaldskrár félagsins.

Í hinni boðuðu ákvörðun gagnvart Mílu sem hér er sett fram er gert ráð fyrir að kostnaði við endurnýjun á þeim svæðum þar sem talið er að markaðsbrestur sé til staðar verði skipt upp á milli Mílu (alþjónustuhafa), notanda og eftir atvikum jöfnunarsjóðs alþjónustu. Gert er ráð fyrir að um þrepaskipta kostnaðarhlutdeild verði að ræða. Þetta er nánar sett fram í lið 5.5 í hinni boðuðu ákvörðun.

Jafnframt verður Mílu heimilt að sleppa því að leggja tengingar þar sem kostnaður færi yfir 2 milljónir. Þetta á við í þeim tilvikum þar sem fjöldi tenginga sem þyrfti að endurnýja er undir 200 talsins.

Þá eru í hinni boðuðu ákvörðun sett tiltekin skilyrði fyrir úthlutun úr jöfnunarsjóði alþjónustu.

Gert er ráð fyrir að útnefningin geti gilt til 31. desember 2020, en endurskoðun á kostnaðarhlutdeild aðila skal vera lokið fyrir 1. janúar 2017.

Hér með er öllum hagsmunaaðilum gefinn kostur á að koma með athugsemdir við hina boðuðu ákvörðun.

Frestur til að koma að athugasemdum er til 26. september 2014.


Sjá hina boðuðu ákvörðun í heild:
Boðun ákvörðunar PFS um skyldur Mílu ehf., innan alþjónustu, að útvega tengingu við almenna fjarskiptanetið


Til baka