Póst og fjarskiptastofnun

Túngumál EN
Heim

Íslandspóstur fær heimildir til að loka póstafgreiðslum í Vík og á Kirkjubæjarklaustri

2. mars 2015

Póst- og fjarskiptastofnun (PFS) hefur samþykkt beiðnir Íslandspósts um heimild til að loka póstafgreiðslum í Vík í Mýrdal og á Kirkjubæjarklaustri. Í staðinn ætlar Íslandspóstur að nota póstbíll til að sinna þjónustu við íbúa svæðisins.
Það er mat stofnunarinnar að sú þjónusta sem Íslandspóstur ætlar að veita í stað póstafgreiðslunnar fullnægi gæðakröfum laga um póstþjónustu nr. 19/2002, sem og þeim skyldum sem hvíla á fyrirtækinu sem alþjónustuveitanda.

Ein meginskylda Íslandspósts er að afhenda bréf og böggla til skráðs viðtakanda sem og að móttaka bréf og böggla til póstmeðferðar frá viðskiptavinum sínum. Engin breyting er boðuð af hálfu Íslandspósts varðandi útburð póstsendinga á svæðinu. Breytingin felst eingöngu í þeim þætti starfseminnar er varðar móttöku sendinga á sérstökum afgreiðslustað. Með þeim breytingum sem Íslandspóstur hefur boðað með lokun afgreiðslustaðarins í Vík og á Kirkjubæjarklaustri, verður ekki séð að fyrirtækið standi ekki lengur við þessar skyldur. Bréfberi/bílstjóri mun nú taka á móti póstsendingum frá íbúum og fyrirtækjum á þessum stöðum með sama hætti og hann hefur gert hjá íbúum utan þéttbýlis um áraraðir og nú í seinni tíð á minni þéttbýliskjörnum víðs vegar um landið, s.s. Eyrarbakka, Stokkseyri og Stöðvarfirði svo einhverjir staðir séu nefndir. Ekki verður annað séð en að eina hugsanlega óhagræðið sem í þessu felst sé að ekki er lengur afgreiðslustaður með fyrirfram skilgreindum opnunartíma. Á móti kemur að íbúar geta hringt í bréfbera/bílstjóra og pantað þjónustu á viðverutíma starfsmannsins eins og segir í skýringum með breytingunum. Póstkassi verður á báðum þesum stöðum og í hann verður áfram hægt að koma almennum bréfum til skila sem bera með sér að burðargjöld hafi verið greidd.

Sjá nánar um forsendur og rökstuðning í ákvörðununum sjálfum:

Ákvörðun PFS nr. 3/2015 um lokun póstafgreiðslu í Vík (póstnúmer 870)
Ákvörðun PFS nr. 4/2015 um lokun póstafgreiðslu á Kirkjubæjarklaustri (póstnúmer 880)

Til baka