Hoppa yfir valmynd

PFS kallar eftir samráði um endurskoðun gjaldskrár Mílu fyrir lúkningarhluta leigulína

Túngumál EN
Heim

PFS kallar eftir samráði um endurskoðun gjaldskrár Mílu fyrir lúkningarhluta leigulína

25. maí 2016

Póst- og fjarskiptastofnun (PFS) hefur lokið við yfirferð á kostnaðargreiningu Mílu ehf. á heildsölugjaldskrá fyrir lúkningarhluta leigulína. Þær vörur sem verðskrá Mílu nær til tilheyra heildsölumarkaði fyrir lúkningarhluta leigulína sem er markaður nr. 6 samkvæmt tilmælum Eftirlitsstofnunar EFTA (ESA) frá árinu 2008.

Samkvæmt meðfylgjandi drögum að ákvörðun hyggst PFS samþykkja kostnaðargreiningu Mílu með þeim breytingum sem gerðar voru við meðferð greiningarinnar hjá stofnuninni.

Drög þessi byggja á ákvörðun PFS nr. 8/2014 um útnefningu fyrirtækis með umtalsverðan markaðsstyrk og álagningu kvaða á heildsölumarkaði fyrir lúkningarhluta leigulína. Í þeirri ákvörðun var Míla útnefnd með umtalsverðan markaðsstyrk á viðkomandi markaði og lagðar voru viðeigandi kvaðir á fyrirtækið, m.a. um eftirlit með gjaldskrá.

Niðurstaða kostnaðargreiningar Mílu er að gjaldskráin hækki að meðaltali um 5% frá núverandi gjaldskrá fyrir mánaðargjöld en misjafnt er eftir gjaldskrárliðum hvort mánaðarverð hækkar eða lækkar. Hækkunin er í samræmi við verðlagsþróun frá því núverandi gjaldskrá tók gildi. Gjaldskráin tekur mið af fyrirhugaðri hækkun á mánaðargjaldi fyrir aðgang að koparheimtaugum Mílu.

Hér með er fjarskiptafyrirtækjum og öðrum hagsmunaaðilum gefinn kostur á að gera athugasemdir vegna þeirra draga sem hér liggja fyrir, sbr. 6. gr. laga nr. 69/2003 um Póst- og fjarskiptastofnun. Allar athugasemdir skulu gerðar með greinanlegum hætti þar sem vísað skal í þá liði sem um ræðir. Þegar PFS hefur metið framkomnar athugasemdir og gert þær breytingar á frumdrögunum sem stofnunin telur nauðsynlegar mun PFS senda drögin til ESA til samráðs áður en endanleg ákvörðun verður tekin.

Frestur til að skila inn umsögnum og athugasemdum er til og með 15. júní nk.

Nánari upplýsingar veitir Hulda Ástþórsdóttir (netfang: hulda(hjá)pfs.is). PFS mun birta opinberlega allar athugasemdir sem berast, nema sérstaklega verði óskað trúnaðar og mun þá stofnunin leggja mat á slíka beiðni.

Sjá samráðsskjal:

Frumdrög - Heildsölugjaldskrá fyrir lúkningarhluta leigulína (Markaður 6)

 

 

Til baka