Hoppa yfir valmynd

PFS samþykkir beiðni Íslandspósts um lokun póstafgreiðslu í Vogum

Túngumál EN
Heim

PFS samþykkir beiðni Íslandspósts um lokun póstafgreiðslu í Vogum

19. júlí 2016

Póst- og fjarskiptastofnun (PFS) hefur samþykkt beiðni Íslandspósts um heimild til að loka póstafgreiðslu fyrirtækisins í Vogum. Í staðinn ætlar Íslandspóstur að nota póstbíll til að sinna þjónustu við íbúa  sveitarfélagsins.

Það er mat stofnunarinnar að sú þjónusta sem Íslandspóstur ætlar að veita í stað póstafgreiðslunnar fullnægi gæðakröfum laga um póstþjónustu nr. 19/2002, sem og þeim skyldum sem hvíla á fyrirtækinu sem alþjónustuveitanda.

Ein meginskylda Íslandspósts er að afhenda bréf og böggla til skráðs viðtakanda sem og að móttaka bréf og böggla til póstmeðferðar frá viðskiptavinum sínum. Engin breyting er boðuð af hálfu Íslandspósts varðandi útburð póstsendinga á svæðinu. Breytingin felst eingöngu í þeim þætti starfseminnar er varðar móttöku sendinga á sérstökum afgreiðslustað. Með þeim breytingum sem Íslandspóstur hefur boðað með lokun afgreiðslustaðarins, verður ekki séð að fyrirtækið standi ekki lengur við þessar skyldur. Bréfberi/bílstjóri mun nú taka á móti póstsendingum frá íbúum og fyrirtækjum með sama hætti og hann hefur gert hjá íbúum utan þéttbýlis um áraraðir og nú í seinni tíð á minni þéttbýliskjörnum víðs vegar um landið. Ekki verður annað séð en að eina hugsanlega óhagræðið sem í þessu felst sé að ekki er lengur afgreiðslustaður með fyrirfram skilgreindum opnunartíma. Á móti kemur að íbúar geta hringt í bréfbera/bílstjóra og pantað þjónustu á viðverutíma starfsmannsins eins og segir í skýringum með breytingunum. Póstkassi verður áfram sem hægt er að koma almennum bréfum til skila sem bera með sér að burðargjöld hafi verið greidd.

Sjá nánar um forsendur og rökstuðning í ákvörðuninni:

Ákvörðun nr. 8/2016 - Lokun póstafgreiðslu í Vogum (póstnúmer 190) (pdf)

 

.

S

.

S

Til baka