Hoppa yfir valmynd

PFS kallar eftir samráði um gjaldskrá fyrir lúkningu í farsímanetum

Túngumál EN
Heim

PFS kallar eftir samráði um gjaldskrá fyrir lúkningu í farsímanetum

11. ágúst 2016

Póst- og fjarskiptastofnun (PFS) hefur nú framkvæmt verðsamanburð til að ákvarða hámarksverð fyrir lúkningu símtala í einstökum farsímanetum sem gilda skulu á árinu 2017. Verðsamanburðurinn byggir á ákvörðun PFS nr. 20/2015 um útnefningu fyrirtækja með umtalsverðan markaðsstyrk og álagningu kvaða á heildsölumörkuðum fyrir lúkningu símtala í einstökum farsímanetum. Framkvæmd og niðurstaða verðsamanburðarins er nánar tilgreind í þeim ákvörðunardrögum sem hér eru lögð fram til samráðs.

Samkvæmt ákvörðun PFS nr. 20/2015 skal stofnunin beita verðsamanburði til að ákvarða hámarks lúkningarverð íslenskra farsímafyrirtækja eins og gert hefur verið síðustu ár. PFS skal taka ákvörðun um hámarks lúkningarverð íslenskra fjarskiptafyrirtækja, eigi síðar en 1. nóvember ár hvert, að undangengnu innanlandssamráði og samráði við Eftirlitsstofnun EFTA (ESA).

Lúkningarverð í heildsölu hafa farið lækkandi hér á landi frá því að PFS fór að ákvarða þau út frá verðsamanburði í samræmi við tilmæli ESA varðandi afskipti eftirlitsstofnana af lúkningarverðum í farsímanetum og föstum netum. Núverandi lúkningarverð, sem gildir á árinu 2016, var ákvarðað með ákvörðun PFS nr. 28/2015, frá 30. október 2015 en þá kvað stofnunin á um að lúkningarverð skyldi lækkað úr 1,52 kr./mín. í 1,40 kr./mín., frá og með 1. janúar 2016.

Niðurstaða frumgreiningar PFS, sem hér er lögð til samráðs, er að frá og með 1. janúar 2017 til og með 31. desember 2017 skuli lúkningarverðið vera 1,23 kr./mín. hjá öllum íslenskum farsímanetsrekendum, þ.e. Símanum, Vodafone, Nova, IMC/Alterna og 365.

Óskað er viðbragða fjarskiptafyrirtækja og annarra hagsmunaaðila við þeim frumdrögum sem hér liggja fyrir, sbr. 6. gr. laga nr. 69/2003 um Póst- og fjarskiptastofnun. Allar athugasemdir skulu gerðar með greinanlegum hætti þar sem vísað skal í þá liði sem um ræðir.

Frestur til að skila inn umsögnum og athugasemdum er til og með 1. september nk. PFS hyggst svo senda uppfærð drög að ákvörðun til samráðs hjá ESA síðar í þeim mánuði.

Nánari upplýsingar veitir Hulda Ástþórsdóttir (netfang: hulda(hjá)pfs.is)

PFS mun birta opinberlega allar athugasemdir sem berast, nema sérstaklega verði óskað trúnaðar og mun þá stofnunin leggja mat á slíka beiðni.

 

Sjá samráðsskjölin:

Frumdrög: Heildsölugjaldskrá fyrir lúkningu símtala í einstökum farsímanetum

Viðauki I – Gengistafla

 

 

 

Til baka