Póst og fjarskiptastofnun

Túngumál EN
Heim

PFS kallar eftir samráði um heildsölugjaldskrá fyrir upphaf og lúkningu símtala í talsímanetum

11. ágúst 2016

Póst- og fjarskiptastofnun (PFS) hefur nú framkvæmt verðsamanburð til að ákvarða hámarksverð fyrir upphaf og lúkningu símtala í föstum talsímanetum. Verðsamanburðurinn byggir á ákvörðun PFS nr. 36/2012 um útnefningu fyrirtækja með umtalsverðan markaðsstyrk og álagningu kvaða á heildsölumörkuðum fyrir upphaf og lúkningu símtala í föstum almennum talsímanetum (markaðir 2 og 3), sem birt var þann 14. desember 2012. Framkvæmd og niðurstaða verðsamanburðarins er nánar tilgreind í þeim ákvörðunardrögum sem hér eru lögð fram til samráðs.

Núgildandi hámarksverð fyrir upphaf og lúkningu símtala í föstum talsímanetum voru ákvörðuð með verðsamanburði sbr. ákvörðun PFS nr. 19/2015. Hámarksverð Símans fyrir upphaf símtala eru nú 0,56 kr./mín. en hámarksverð Símans, Vodafone, Nova, Símafélagsins og Hringdu fyrir lúkningu símtala eru nú 0,16 kr./mín. Verð þessi gilda til loka ársins 2016.

Niðurstaða frumgreiningar PFS sem hér er lögð fram til samráðs er að heildsölugjald fyrir upphaf símtala í föstu talsímaneti Símans skuli að hámarki vera 0,50 kr./mín. Það er jafnframt niðurstaða PFS að heildsölugjald fyrir lúkningu símtala í föstum almennum talsímanetum skuli vera 0,14 kr./mín. og skal það verð gilda sem hámarksverð hjá Símanum, Vodafone, Nova, Símafélaginu og Hringdu. Nánari lýsingu á þeim viðmiðum sem fylgt var við verðsamanburðinn má finna í frumdrögunum.

Óskað er viðbragða fjarskiptafyrirtækja og annarra hagsmunaaðila við þeim frumdrögum sem hér liggja fyrir, sbr. 6. gr. laga nr. 69/2003 um Póst- og fjarskiptastofnun. Allar athugasemdir skulu gerðar með greinanlegum hætti þar sem vísað skal í þá liði sem um ræðir.

Frestur til að skila inn umsögnum og athugasemdum er til og með 1. september n.k. PFS hyggst svo senda uppfærð drög að ákvörðun til samráðs hjá ESA síðar í þeim mánuði.

Nánari upplýsingar veitir Hulda Ástþórsdóttir (netfang: hulda(hjá)pfs.is).

PFS mun birta opinberlega allar athugasemdir sem berast, nema sérstaklega verði óskað trúnaðar og mun þá stofnunin leggja mat á slíka beiðni.

Sjá samráðsskjölin:

Drög að ákvörðun - Heildsölugjaldskrá fyrir upphaf og lúkningu símtala í föstum almennum talsímanetum

Viðauki I - Gengistafla

 

 

Til baka