Hoppa yfir valmynd

Tvær nýjar ákvarðanir í kjölfar greininga á mörkuðum fyrir talsímaþjónustu.

Túngumál EN
Heim

Tvær nýjar ákvarðanir í kjölfar greininga á mörkuðum fyrir talsímaþjónustu.

23. desember 2016

Póst- og fjarskiptastofnun (PFS) birtir nú tvær ákvarðanir í kjölfar markaðsgreininga á mörkuðum fyrir talsímaþjónustu á fastlínunetum. Annars vegar er um að ræða ákvörðun nr. 22/2016 um útnefningu fyrirtækja með umtalsverðan markaðsstyrk á heildsölumarkaði fyrir lúkningu símtala í föstum almennum talsímanetum, markaður nr. 1/2016. Hins vegar er um að ræða ákvörðun nr. 23/2016 um markaðsgreiningu á smásölumarkaði fyrir aðgang að fasta almenna talsímanetinu (markaður 1/2008) og heildsölumarkaði fyrir upphaf símtala í fasta almenna talsímanetinu (markaður 2/2008).

Með ákvörðun nr. 22/2016 eru Síminn, Vodafone, Nova, Hringdu, Símafélagið og Tismi útnefnd sem fyrirtæki með umtalsverðan markaðsstyrk á heildsölumarkaði fyrir lúkningu símtala í föstum talsímanetum og viðeigandi kvaðir lagðar á þau, þ.m.t. kvöð um aðgang, jafnræði og eftirlit með gjaldskrá. PFS hyggst aflétta af Símanum kvöð um opinbera birtingu viðmiðunartilboðs og aflétta kvöð um bókhaldslega aðgreiningu af Símanum og Vodafone.

Með ákvörðun nr. 23/2016 er kvöðum aflétt af Símanum á heildsölumarkaði fyrir upphaf símtala þar sem viðkomandi markaður uppfyllir ekki lengur skilyrði fyrir útnefningu aðila með umtalsverðan markaðsstyrk og álagningu kvaða, þar sem ekki eru lengur fyrir hendi verulegar aðgangshindranir á viðkomandi markaði. Með sömu ákvörðun er kvöðum einnig aflétt af Símanum á smásölumarkaði fyrir aðgang að almenna talsímanetinu þar sem viðkomandi markaður uppfyllir ekki lengur skilyrði fyrir útnefningu aðila með umtalsverðan markaðsstyrk og álagningu kvaða, þar sem ekki eru lengur fyrir hendi verulegar aðgangshindranir á viðkomandi markaði. Stofnunin leysir Símann undan kvöðum á viðkomandi mörkuðum í árslok 2017 þannig að fjarskiptafyrirtæki í heildsöluviðskiptum við Símann hafi hæfilegan aðlögunartíma til að mæta breyttum aðstæðum.

Efnt var til innanlandssamráðs fyrr í haust um drög PFS að greiningu á ofangreindum mörkuðum. Markaður 1/2016 var greindur sérstaklega og markaðir 1/2008 og 2/2008 voru greindir saman. Samráð um drög að greiningunum stóð frá í annarri viku október sl. í fjórar vikur. Athugasemdir bárust frá Samkeppniseftirlitinu.

Þann 22. nóvember sl. voru drög að ákvörðununum send til samráðs til Eftirlitsstofnunar EFTA (ESA)   og annarra fjarskiptaeftirlitsstofnana á EES-svæðinu með vísan til 7. gr. laga nr. 69/2009 um Póst- og fjarskiptastofnun. Þessir aðilar gerðu ekki athugasemdir við ákvörðunardrögin og því getur PFS tekið formlega ákvörðun í málinu í samræmi við ákvörðunardrögin.

Sjá nánar í ákvörðununum sjálfum og viðaukum:

  • Ákvörðun PFS nr. 22/2016 - Útnefning fyrirtækja með umtalsverðan markaðsstyrk og álagning kvaða á heildsölumarkaði fyrir lúkningu símtala í einstökum föstum almennum talsímanetum (markaður 1/2016)
  • Ákvörðun PFS nr. 23/2016 - Um niðurfellingu kvaða á smásölumarkaði fyrir aðgang að fasta almenna talsímanetinu og heildsölumarkaði fyrir upphaf símtala í fasta almenna talsímanetinu (markaðir 1-2/2008)
    • Viðauki A - Greining á smásölumarkaði fyrir aðgang að fasta almenna talsímanetinu (Markaður 1/2008) og heildsölumarkaði fyrir upphaf símtala í fasta almenna talsímanetinu (Markaður 2/2008)
    • Viðauki B - Álit ESA

 

 

Til baka