Póst og fjarskiptastofnun

Túngumál EN
Heim

Takmarkað samráð um gjaldskrár Mílu fyrir koparheimtaugar, bitastraum og lúkningarhluta leigulína

31. mars 2017

PFS hefur haft til meðferðar kostnaðareiningar vegna gjaldskráa Mílu fyrir koparheimtaugar (markaður 4/2008), bitastraum (markaður 5/2008) og aðgang að lúkningarhluta leigulína (markaður 6/2008). Vegna innbyrðis tengsla þessara gjaldskráa er nauðsynlegt að þær taki gildi á sama tíma.

PFS hefur nú yfirfarið kostnaðarlíkön og uppbyggingu gjaldskráa Mílu á þessum þremur mörkuðum (4/2008, 5/2008 og 6/2008). Jafnframt hafa hagsmunaaðilar fengið tækifæri til að tjá sig um aðferðafræði Mílu við ákvörðun verðs sem og uppbyggingu gjaldskráa. Hins vegar byggðu kostnaðarlíkön Mílu á kostnaðargrunni frá 2014 og fór PFS fram á að Míla myndi uppfæra kostnaðarlíkönin á þessum mörkuðum miðað við rekstrarárið 2016.

Míla hefur nú uppfært kostnaðarlíkönin með nýjum upplýsingum frá síðasta rekstrarári. PFS hefur í kjölfarið yfirfarið kostnaðargreiningarnar og uppfært þau drög að ákvörðun sem PFS hafði þegar lagt fram í innanlandssamráði vegna þessara gjaldskrárbreytinga.

Þar sem uppfærslan hafði í för með sér breytingu á verðum efnir PFS nú til takmarkaðs samráðs um þessa niðurstöðu. Þar sem aðilum hefur þegar verið gefinn kostur á að tjá sig um uppbyggingu gjaldskrár Mílu og aðferðafræðina við útreikninga í fyrri samráðum er ekki gefinn kostur á að koma með athugasemdir við þessi atriði nú. Samráðið snýr eingöngu að niðurstöðu um verð úr þessum kostnaðarlíkönum og áhrif þessarar niðurstöðu á markaðinn hér á landi.

Hér með er óskað viðbragða frá fjarskiptafyrirtækjum og öðrum hagsmunaaðilum við framangreindum breytingum á frumdrögunum. Athugasemdir skulu berast með pósti eða með tölvupósti til Póst- og fjarskiptastofnunar, stílaðar á Huldu Ástþórsdóttur (hulda(hjá)pfs.is) ekki síðar en miðvikudaginn 19. apríl 2017. PFS mun birta opinberlega allar athugasemdir sem berast, nema sérstaklega verði óskað trúnaðar og mun þá stofnunin leggja mat á slíka beiðni.

Áður en endanleg ákvörðun verður tekin mun PFS senda ákvörðunardrögin til ESA og annarra eftirlitsstofnana á EES-svæðinu til samráðs, sbr. ákvæði 1. mgr. 7. gr. laga nr. 69/2003, um Póst- og fjarskiptastofnun, og 7. gr. rammatilskipunar ESB.

Samráðsskjöl:
Endurskoðun á heildsölugjaldskrá Mílu fyrir koparheimtaugar (Markaður 4/2008)

Endurskoðun á heildsölugjaldskrá Mílu fyrir bitastraumsaðgang (Markaður 5/2008) (Uppfært 10.4.2017 með leiðréttri töflu á bls. 40)

Endurskoðun á heildsölugjaldskrá Mílu fyrir bitastraumsaðgang (Markaður 5/2008) - Viðauki 1

Endurskoðun á heildsölugjaldskrá Mílu fyrir lúkningarhluta leigulína (Markaður 6/2008)

Endurskoðun á heildsölugjaldskrá Mílu fyrir lúkningarhluta leigulína (Markaður 6/2008) - Viðauki 1

Til baka