Póst og fjarskiptastofnun

Túngumál EN
Heim

PFS hefur ákvarðað ný heildsöluverð fyrir lúkningu símtala í farsímanetum og föstum almennum talsímanetum

26. október 2017

Póst- og fjarskiptastofnun (PFS) hefur birt ákvarðanir sínar nr. 21/2017 um heildsölugjaldskrá fyrir lúkningu símtala í föstum almennum talsímanetum (markaður 1/2016) og nr. 22/2017 um heildsölugjaldskrá fyrir lúkningu símtala í farsímanetum (markaður 2/2016). Mælt er fyrir um að niðurstaða verðsamanburðar sem stofnunin hefur framkvæmt verði grundvöllur hámarksverða fyrir lúkningu símtala í farsímanetum og föstum almennum talsímanetum.

Lúkningarverð í heildsölu hafa farið lækkandi hér á landi frá því að PFS fór að ákvarða þau út frá verðsamanburði í samræmi við tilmæli ESA varðandi afskipti eftirlitsstofnana af lúkningarverðum í farsímanetum og föstum netum. Samkvæmt niðurstöðu PFS sem birtar eru í þessum ákvörðunum munu verðin halda áfram að lækka.

Ákvörðun nr. 21/2017 - Heildsölugjaldskrá fyrir lúkningu símtala í föstum almennum talsímanetum

Ákvörðun þessi byggir á ákvörðun PFS nr. 22/2016, dags. 23. desember 2016, um útnefningu fyrirtækja með umtalsverðan markaðsstyrk og álagningu kvaða á heildsölumörkuðum fyrir lúkningu símtala í föstum almennum talsímanetum. Kveðið er á um í hinni nýju ákvörðun að heildsölugjöld fyrir lúkningu símtala í föstum almennum talsímanetum skuli vera að hámarki 0,11 kr./mín. fyrir tímabilið 1. janúar 2018 til 31. desember 2018. Núverandi lúkningarverð, 0,14 kr. á mínútu, mun gilda áfram óbreytt til og með 31. desember 2017.

Sjá ákvörðunina og viðauka í PDF formi hér fyrir neðan:

Ákvörðun nr. 22/2017 - Heildsölugjaldskrá fyrir lúkningu símtala í einstökum farsímanetum

Ákvörðun þessi byggir á ákvörðun PFS nr. 20/2015, dags. 31. júlí 2015, um útnefningu fyrirtækja með umtalsverðan markaðsstyrk og álagningu kvaða á heildsölumörkuðum fyrir lúkningu símtala í einstökum farsímanetum. Kveðið er á um í hinni nýju ákvörðun að heildsölugjöld fyrir lúkningu símtala í einstökum farsímanetum skuli vera að hámarki 0,97 kr./mín. fyrir tímabilið 1. janúar 2018 til 31. desember 2018. Núverandi lúkningarverð, 1,23 kr. á mínútu, mun gilda áfram óbreytt til og með 31. desember 2017.

Sjá ákvörðunina og viðauka í PDF formi hér fyrir neðan:

 

 

Á tímabilinu 10. ágúst til 31. ágúst sl. fór fram innanlandssamráð um umræddar breytingar á gjaldskrá fyrir lúkningu símtala í farsímanetum og föstum almennum talsímanetum. Engar athugasemdir bárust í samráðinu. Þá voru drög að ofangreindum ákvörðunum send Eftirlitsstofnun EFTA (ESA) og öðrum eftirlitsstofnunum á EES-svæðinu til samráðs þann 26. september sl. Álit ESA bárust þann 25. september sl. og gerði stofnunin ekki athugasemdir við ákvörðunardrög PFS.

 

 

Til baka