Póst og fjarskiptastofnun

Túngumál EN
Heim

Íslenskur fjarskiptamarkaður í tölum - Tölfræðiskýrsla PFS fyrir árið 2018 komin út

4. júní 2019

Tvisvar á ári safnar Póst- og fjarskiptastofnun (PFS) upplýsingum frá skráðum fjarskiptafyrirtækjum hér á landi um ýmsar stærðir í rekstri og þjónustu á sviði fjarskipta. Upp úr þeim tölum vinnur stofnunin tölfræðiskýrslur sem sýna upplýsingar um helstu stærðir og fyrirtæki á íslenskum fjarskiptamarkaði. Markmiðið er að bæta upplýsingagjöf og auka gagnsæi á þessum markaði og eru skýrslur PFS í samræmi við þær skýrslur sem systurstofnanir PFS í nágrannalöndum okkar gefa út. 

Skýrslan sem nú er birt sýnir tölfræði um fjarskiptamarkaðinn fyrir árið 2018. Hún inniheldur tölulegar upplýsingar um helstu þætti á markaðnum og samanburð við stöðuna á árunum á undan. Skýrslunni er skipt upp eftir fastanetinu, farsímanetinu, föstum internettengingum og veltu og fjárfestingu á fjarskiptamarkaði. 

Meðal helstu tölulegu upplýsinga um íslenska fjarskiptamarkaðinn árið 2018 má nefna: 

Fjöldi áskrifenda með heimasíma fækkar lítillega milli ára en mínútum heldur áfram að fækka mikið eða um 18%. Netsímaáskrifendum (VoIP) hefur fjölgað með aukinni lagningu ljósleiðara og niðurlagningu á eldra heimasímakerfi (PSTN kerfi) Símans. Síminn og Vodafone eru stærstu fyrirtækin á markaði fyrir heimasíma með um 93% hlutdeild.  

Farsímaáskriftum fjölgar lítillega og skipta þrjú félög, Síminn, Nova og Vodafone nokkurn veginn jafnt með sér markaðshlutdeild á farsímamarkaði. Skilaboðum (SMS og MMS) fjölgar milli ára en gagnamagn á farsímaneti heldur áfram að aukast þó dregið hafi úr aukningunni, en hún hefur verið mjög mikil undanfarin ár með innleiðingu á 4G. Í farsímanetum er hlutfallslega meira gagnamagn notað í símum en í öðrum tækjum sem eru eingöngu fyrir gagnanotkun, t.d. spjaldtölvum. 

Internettengingum fjölgar þegar á heildina er litið, en mikil aukning er í ljósleiðaratengingum samhliða fækkun í xDSL tengingum. Í lok árs 2018 voru ljósleiðaratengingar um 53% allra internettenginga. 

PFS birtir nú í fyrsta sinn upplýsingar um gagnamagn á fastaneti og þar kemur í ljós að hver notandi er að meðaltali að hala niður 182 GB per mánuð og senda frá sér um 34 GB per mánuð. 

Áskrifendur með sjónvarp yfir IPTV voru 98.923 í lok árs 2018, en voru 101.154 í lok árs 2017 og hefur því fækkað um 2%. 

Velta á fjarskiptamarkaði jókst á árinu 2018. Tekjur af heimasíma, farsíma og sjónvarpsþjónustu  fóru lækkandi en aftur á móti hafa tekjur af fastaneti, gagnaflutningum og internetþjónustu farið hækkandi. 

Fjárfesting á fjarskiptamarkaði er aðallega í fastaneti, m.a. vegna lagningar ljósleiðara. 

Helstu stærðir á fjarskiptamarkaði má sjá í töflunni hér fyrir neðan sem einnig er að finna í skýrslunni sjálfri. 
Nú geta áhugasamir einnig skoðað gögnin frá hinum ýmsu sjónarhornum á nýju Gagnatorgi PFS. Gagnatorginu er skipt í 4 yfirflokka; farsímanet, breiðband, IPTV og fastanet og þar undir eru 9 flokkar sem hægt er að skoða útfrá t.d. tímabilum og þjónustuveitendum.



Tölfræðiskýrslan í heild. 
Ásamt skýrslunni er birt Excel skjal með bakgrunnsupplýsingum skýrslunnar í töflum og myndum. 

Til baka