Hoppa yfir valmynd

Íslenskur fjarskiptamarkaður í tölum - Tölfræðiskýrsla PFS fyrir árið 2019 komin út

Túngumál EN
Heim

Íslenskur fjarskiptamarkaður í tölum - Tölfræðiskýrsla PFS fyrir árið 2019 komin út

14. maí 2020

Tvisvar á ári safnar Póst- og fjarskiptastofnun (PFS) upplýsingum frá skráðum fjarskiptafyrirtækjum hér á landi um ýmsar stærðir í rekstri og þjónustu á sviði fjarskipta. Upp úr þeim tölum vinnur stofnunin tölfræðiskýrslur sem sýna upplýsingar um helstu stærðir og fyrirtæki á íslenskum fjarskiptamarkaði. Markmiðið er að bæta upplýsingagjöf og auka gagnsæi á þessum markaði og eru skýrslur PFS í samræmi við þær skýrslur sem systurstofnanir PFS í nágrannalöndum okkar gefa út. 

Skýrslan sem nú er birt sýnir tölfræði um fjarskiptamarkaðinn fyrir árið 2019. Hún inniheldur tölulegar upplýsingar um helstu þætti á markaðnum og samanburð við stöðuna á árunum á undan. Skýrslunni er skipt upp eftir fastanetinu, farsímanetinu, föstum internettengingum og veltu og fjárfestingu á fjarskiptamarkaði. 

Meðal helstu tölulegu upplýsinga um íslenska fjarskiptamarkaðinn árið 2019 má nefna: 

Fjöldi áskrifenda með heimasíma heldur áfram að fækka milli ára eða um rúm 7% og mínútum fækkar um tæp 15%. Netsímaáskrifendum (VoIP) fjölgar um 5% milli ára sem er m.a. vegna aukinni lagningu ljósleiðara og niðurlagningu á eldra heimasímakerfi (PSTN kerfi) Símans. Síminn og Vodafone eru stærstu fyrirtækin á markaði fyrir heimasíma með um 92% hlutdeild í lok árs 2019.  

Heildarfjöldi farsímaáskrifta fjölgar lítillega milli ára eða um 1% og er fjölgun í samningsbundnum áskriftum en fyrirfram greiddum áskriftum fækkar. Fjöldi mínútna úr farsímum fjölgar um tæp 5% og einnig er fjölgun í skilaboðum (SMS og MMS) en þó aðallega í MMS sem fjölgar um 17%. Gagnamagn á farsímaneti heldur áfram að aukast milli ára eða um 50% en hún hefur verið mjög mikil undanfarin ár með innleiðingu á 4G. Í farsímanetum er hlutfallslega meira gagnamagn notað í símum en í öðrum tækjum sem eru eingöngu fyrir gagnanotkun, t.d. spjaldtölvum eða 4G netbúnaði.  

Internettengingum fjölgar þegar á heildina er litið, en mikil aukning er í ljósleiðaratengingum samhliða fækkun í xDSL tengingum. Í lok árs 2019 voru ljósleiðaratengingar um 62% allra internettenginga. 

Heildargagnamagn á fastaneti jókst um tæp 27% milli ára og er um 85% gagnamagnsins vegna niðurhals en 15% vegna upphals. 

Áskrifendur með sjónvarp yfir IPTV voru 91.815 í lok árs 2019, en voru 98.923 í lok árs 2018 og hefur því fækkað um 7% milli ára og er þetta annað árið í röð sem notendum með IPTV fækkar. 

Velta á fjarskiptamarkaði jókst á árinu 2019. Tekjur af heimasíma, farsíma og gagnaflutningi og internetþjónustu fóru lækkandi en tekjur af fastaneti og sjónvarpsþjónustu og annarri fjölmiðlun farið hækkandi. 

Fjárfesting á fjarskiptamarkaði er aðallega í fastaneti, m.a. vegna lagningar ljósleiðara. 

Helstu stærðir á fjarskiptamarkaði má sjá í töflunni hér fyrir neðan sem einnig er að finna í skýrslunni sjálfri. 

Hægt er að skoða gögnin frá hinum ýmsu sjónarhornum á Gagnatorgi PFS. Gagnatorginu er skipt í 4 yfirflokka; farsímanet, breiðband, IPTV og fastanet og þar undir eru 9 flokkar sem hægt er að skoða útfrá t.d. tímabilum og þjónustuveitendum.


Tölfræðiskýrslan í heild.  Ásamt skýrslunni er birt  
Excel skjal með bakgrunnsupplýsingum  skýrslunnar í töflum og myndum. 

 

Til baka